«رۋحاني جاڭعىرۋ» باعدارلاماسى اياسىندا «كىتاپحانا – قوعامنىڭ كوپفۋنكتسيانالدى, كوپدەڭگەيلى الەۋمەتتىك ينستيتۋتى» تاقىرىبىندا بۇكىلقازاقستاندىق كىتاپحاناشىلار سەزى باستالدى.
قىركۇيەك ايىنىڭ 13-14 كۇندەرىنە جوسپارلانعان ماڭىزدى مادەني شاراعا ەلىمىز وڭىرلەرىنەن ەكى جۇزگە تارتا كىتاپحانا سالاسىنىڭ ماماندارى كەلدى. ۇيىمداستىرۋشىلاردىڭ ايتۋىنشا, كىتاپحاناشىلار سەزى رەسپۋبليكاداعى كىتاپحانا سالاسىنىڭ بولاشاقتاعى ساياساتىن ايقىندايتىن, جاڭعىرتاتىن جانە جاڭاشا سەرپىن بەرەتىن ماڭىزدى مادەني وقيعا بولىپ تابىلادى.
قازاقستان كىتاپحاناشىلارى 1998 جىلدان كەيىن 20 جىل وتە بارلىق جۇيەلەر مەن ۆەدومستۆولاردىڭ كىتاپحانالىق قاۋىمداستىعىنىڭ العاش رەت باسىن قوسىپ وتىر. سەزگە وتاندىق كىتاپحانا سالاسى وكىلدەرىمەن قاتار اقش, تۇركيا, رەسەي, بەلارۋس, وزبەكستان, تاجىكستان, قىرعىزستان جانە ت.ب. مەملەكەتتەر كىتاپحانالارىنىڭ ماماندارى قاتىسۋدا.
«سازگەن سازى» فولكلورلىق-ەتنوگرافيالىق ءانسامبلىنىڭ سۇيەمەلدەۋىمەن باستالعان مادەني شارا كىتاپ كورمەسى اياسىندا جالعاستى. سەزدىڭ رەسمي ءبولىمى قازاقستان رەسپۋبليكاسى پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ ءتورايىمى بىرعانىم ءايتىموۆا, اقىن ولجاس سۇلەيمەنوۆ, عالىم ءابساتتار دەربىسالى, قازاقستان جازۋشىلار وداعىنىڭ توراعاسى ۇلىقبەك ەسداۋلەت, رەسەي مەملەكەتتىك كىتاپحاناسىنىڭ ديرەكتورى ۆ.ۆ.دۋدا ۇلتتىق كىتاپحانا ديرەكتورى جانات سەيدۋمانوۆ, يۋنەسكو وكىلدەرى, ت.ب. ءسوز سويلەپ, كىتاپحانانىڭ قوعامداعى رولىنە قاتىستى ماڭىزدى ماسەلەلەردلى ورتاعا سالدى.
ەلۆيرا سەرىكقىزى,
«ەگەمەن قازاقستان»
الماتى